Миний цаг

Намайг ингэж бичлээ гэж эрчүүд минь битгий уурлаарай. Яагаад ч юм бүү мэд орчин цагийн эрсийг нийгэм маань нэг л гадуурхангуй нүдээр хараад байна уу даа гэж бодоод л үүнийг бичиж байна. Наад зах нь ээж аавууд эмэгтэй хүүхдээ бөөцийлж, эрдэм мэдлэг эзэмшүүлэхийг хичээдэг. Эр юм яах вэ? жолооч ч болсон хийгээд амиа аваад явна гэж эр хүүхдээ "гадуурхадаг". Урагшаа,хойшоо гахай зөөж охин дүүгийнхээ сургалтын төлбөрийг хийдэг олон ах  нарыг би  мэднэ. Ингэж эрдэм номоос гадуурхагдсан болохоор олигтой ажил лав олдохгүй. Бодоод үз лдээ. Аль ч албан газрын хаалгыг татсан эрх танхи хүүхнүүд дүүрэн. Мэдсэн сурсан зүйл нь базаахгүй болохоор ёстой л бор зүрхээрээ амьдралын төлөө зүтгэнэ. Олигтойхон хийсэн ажил байхгүй лааз өшиглөж яваа түүнийг их сургууль төгссөн хүүхнүүд өрөөсөн нүдээрээ ч харахгүй нь ойлгомжтой. Эрчүүд хүүхнүүддээ гологдоод халхын сайхан хүүхнүүд харийн бэр болоод байна гэж бид ярьдаг, бичдэг. Гэсэн ч үүний гол буруутан нь зөвхөн эрчүүд биш шүү дээ. Эр хүн уйлдаггүй гэж нулимсыг нь хорино, яаж ийж байгаад болно гэж боловсролоос гээнэ, адаг сүүлд нь арчаагүй гэж цоллоно. Эрдэмтэд нэгэн суздалгаа хийжээ. Их сонирхолтой. Аав нар хүүхдүүддээ  ээж нь ямар сайн хүн болохыг боломж гарах бүрт хэлдэг бол , ээж нар хүүхэддээ аав нь яаж өөрийг нь зовоож буй талаар ихэвчлэн ярьдаг гэсэн судалгаа байх юм. Та санал нийлж байна уу? Надад бол үнэний хувьтай юм шиг. Ажиглаад байхад өсвөр насны хүүхэдтэй ээжүүд хүүхэддээ зовлон тоочих нь их байдаг юм шиг. Айл гэр болж, өрх гэр толгойлно. Мэдлэг мэргэжилтэй, өндөр цалинтай эхнэр нь нөхрөө голно, сална. Энэ бол өнөөдөр амьдрал дээр байгаа гэр бүлүүдийн нэг хэсгийнх нь дүр төрх гэвэл хэтрүүлэг болохгүй. Энэ байдал хот хөдөөд өөр л дөө. Хөдөөд бол эр хүнийг үнэлэх үнэлэмж шал өөр. Гэхдээ сайн боловсрол эзэмшиж, сайхан ажил хийж, гэр орноо тэжээж, олны бахархал болж байгаа олон залуусыг би үгүйсгээгүй юм шүү. Зүгээр л бидний залуусын дунд иймэрхүү дүр төрх олон байгаа л гэж хэлэх гэсэн санаатай юм шүү.  Эрчүүд минь энэ  амьдралд шоовдорлогдохгүйн тулд сурч, мэдэж, амьдралын төлөө шантралгүй зүтгээрэй. Нэг зүйлийг мартах шахаж байна. Монголд эмэгтэйчүүдийн гэсэн тодотголтой байгууллага борооны дараах мөөг шиг олон ч эрчүүдийнх харин байдаг юм болов уу? Ойрноос л бид эрэгтэйчүүдийн эмнэлэг гэдэг нэрэнд дасч эхлэж байна. Эрчүүд гэдэг уужим ухаантай хүмүүс. Хэдэн 1000-н жилийн тэртээгээс эмэгтэй хүнийг шүтэж бүтээл туурвилдаа мөнхөлсөөр ирсэн.  Харин одоо эр хүн та өөрийнхөө төлөө зүтгэж цаг нэгэнт иржээ. Хүүхнүүд маань боловсролын сайныг эзэмшиж боломжийн ажил хийж байна.